Landeigandi: Ríkissjóður.
Umsjón: Skógræktarfélag Eyfirðinga.
Stærð: 70 ha.
Friðað: 1951, stækkað síðar.
Hæstu tré 2000: Blágreni og lerki, gróðursett 1960, 7-8 m.


Saga skógarins á Miðhálsstöðum í Öxnadal er all sérstæð.
Skógræktarfélag Eyfirðinga fékk umráðarétt yfir eyðibýlinu Miðhálsstöðum árið 1942 en var fjárvana og réð ekki við girðingarkostnaðinn. Skógrækt ríkisins var þá fengin til verksins og hafði með Miðhálsstaði að gera til 1950 að gert var samkomulag um að S.E. tæki við landinu að nýju og það var loks girt á árunum 1950 - 1951, alls um 50 ha lands. 1972 var síðan girðingin stækkuð og er nú 70 ha.

Frá upphafi var vitað um birkileifar í smáum stíl á Miðhálsstöðum og gerðu menn sér vonir um sjálfgræðslu birkiskógar eftir friðun. Fljótlega kom þi ljós að þær vonig gengu ekki eftir, enda landið þurrt og hrjóstrugt að mestu leyti.

Gróðursett var af kappi í landið frá 1952 - 1965 og voru sjálfboðaliðar atkvæðamiklir þar sem víða í reitum félagsins.

Eftir stækkun girðingarinnar var aftur nokkur kippur í gróðursetningum og svo enn nú allra síðustu árin. Alls hafa verið gróðursetta um 340.000 plöntur á Miðhálsstöðum.


Árangur er æði misjafn, t.d. var miklu plantað af rauðgreni sem ekki hefur dafnað vel á svo rýru landi, en lerki, blágreni og stafafura hafa dafnað vel.

Á Miðhálsstöðum er nú fallegur skógur sem fer einkar vel í landinu eins og sést á myndinni hér efst til hægri.

Lengi voru Miðhálsstaðir annálað berjaland en síðustu ár hefur dregið mjög úr berjasprettu vegna þeirra gróðurfarsbreytinga sem orðið hafa við friðun og ræktun.